盛宴

盛宴
2013年01月14日

　　上周五外圍美股先升，但內地股市跌，搞到港股埋單跌90點收場，收報23264點，內地跌市皆因剛公佈12月內地通脹再度升溫，12月份CPI按年升2.5%，是7個月高位，上證綜指借勢調整1.8%，港股跌咁少，都算市底強啦。
　　有富婆老友致電問我，話手上有啲A50基金(2823)  和幾隻內銀股，都係去年第4季低潮時買，有近兩成利潤(內銀利潤較多)，問我好唔好沽，我第一個反應，係想叫佢候高減持一部份鎖定一啲利潤，突然想起呢個富婆好鍾意走短線，即係屬「走幾格一族」，所以就問佢手上究竟有幾多貨，我話我對揸咗100%滿倉的人同只得10%貨的人，會有不同建議。
　　我講講吓記起富婆上一次打電話俾我已是去年6月底時，我點解記得，係因為那時是長實(001)  差不多一年最低的時候(也是大市差不多最低時)，富婆在90元買咗長實，佢話俾我聽會到92、93元就沽，佢話佢經常係咁，見到個市跌到咁上下就買長實或中電(002)  ，我都無問佢咁買法同佢哋係001號和002號有無關，富婆的手法係低位買，等佢反彈，升3幾個巴仙就走，輸咗就死坐等佢升番上去，有時買得唔夠低，買完仲要跌多10幾個巴仙，真係坐半年一年都唔奇。但隻股一彈升少少佢就走，話有幾萬銀夠佢去歐洲旅行就閃。
　　坐貨唔定 難贏大錢
　　我唔係幾同意呢個做法，雖然富婆有錢可承受風險，佢咁做亦好少輸，因為輸咗就長揸，而且佢買啲股亦好少一沉永遠不起。但呢啲做法係動作多回報少的玩法，我好婉轉咁話，其實90元買的長實都可以坐長啲，而中電就比較貴，因為市場當時風險意識太高，好多錢泊在公用股，將中電買貴哂，所以將來大市回升時，中電都升唔多，叫佢長實可以買，但買中電不如買A50基金或內銀。
　　你睇長實今天乜嘢價？125.9元，問一問富婆，佢果然已在93元沽了，佢當日沽咗只賺3.3%，若唔沽坐到今天，可以賺40%！真正係「天與地」之別。佢另外亦聽我話沽咗中電，換咗內銀和A50基金，可惜大部份賺幾個巴仙又沽了，如今只剩少量股份，佢係屬於只有10%持倉那類人。
　　從富婆的事例可以說明，坐唔定、走幾格一族，雖然好多時都可以在接近低位入市，但因為佢哋坐唔定，所以難贏大錢，佢一年走兩三次，每次買大股走幾格，倒不如低位買入坐定定，贏得仲多。
　　講番富婆問我好唔好沽貨，我答佢如果持倉100%，手上股份又升得好，有兩三成以上盈利，何妨等股份在呢一兩個月再升高少少就減番部份貨，那怕是沽三分之一至一半都得，若然沽完4、5月個市不但唔回仲再升，都仲有貨在手，若然下跌，由於沽了貨有子彈，可以等跌市低位買番。
　　但富婆手上只得10%，我就話沽唔沽都無所謂，一來持倉太少影響不大，二來若連呢啲貨都沽埋，個市最後唔回仲要再升，真係完全得個睇字，相當無癮。
　　大市在去年5月見底，開始彈升，的確是一場盛宴，呢場宴會到家，究竟係食到鮑魚、食到石斑、食到炸子雞、還是食到美點雙輝，唔係咁易沽，不過食到家已經食咗唔少味，肯定唔係啱啱開席。
　　二季回調 機會不低
　　恒指去年5月低位18056點，到而家23264點，升咗5208點，升幅29%，升得唔算少。如今恒指已升穿去年高位，而再對上一年2011年年頭創出的高位近25000點，距離現價只有1700點，假設恒指在第1季升近25000點這個兩年高位時，阻力會相當大。
　　恒指未來走勢有幾個可能性，第一，在第一季見了全年之頂，很大機會不能破25000點，之後反覆回落，這是最差的走勢。第二，在第一季見一個小頂，但全年升勢未完，到下半年再上高峰，升穿上半年的高位，若然如此，下半年的高位就有機會升穿2011年的25000點高位，有機會升到26000點、27000點的新高度，這是最好的走勢。
　　第三，是一個上落市，較大機會在21000點在25000點之間上落，這是一般的走勢。值得注意是即使出現最好的走勢，也不等如會直線向上，中間出現反覆也是很正常的，2010年都係一個向上市，但在當年1月抽上22000點後，在5月回到19000幾點，然後才回升，到11月升上25000點的高峰。所以在第1季沽一點貨，等第二季候低買番，即使在一個好年頭，都可能係有效投資方法。
　　港股會否出現一個反覆向上的最好走勢，要睇港、中、美三地的經濟與股市。以香港計，本地經濟麻麻地，房地產在政府重重打擊下，即使樓價再升，成交都不會太活躍；股市去年好差，今年應會好一點，但暫時未似大牛市；本地零售業面臨高租金和高工資雙重壓力；而以遊客為對象的零售，除了要捱旺區的超貴租外，更面臨生意大不如前的困境。
　　我聽鐘錶珠寶業人士話，其實呢幾個月內地豪客生意並無顯著恢復，珠寶業生意好少少，皆因它們減價清貨而已。內地豪客的生意最旺是2009、2010年，就是阿爺放4萬億救市資金投入市場時，如今的生意和當日比有好較大差距。聽完佢咁講，我認為本地零售股都係可以短炒唔好長揸，如果今年上半年生意都無改善，上半年升完，到9月出半年業績時令人失望，即使大市得，都唔好望佢地下半年高過上半年。整體來說，單靠香港生意，無力推升股市到25000點之上。
　　賣樓回暖 睇好內房
　　內地經濟明顯比香港好，亦係港、中、美三地中最能確定今年會好過去年的地方。由於內地可以用投資推動經濟，所以其升幅亦比較可測，最大挑戰是通脹增長過快，如今已升上2.5%，如很快推高到3.5%以上，就會令阿爺開始收緊水源，所以要觀察通脹的增長，但現時通脹水平始終較低，憂慮不會太大。我最近去了北京一轉，發現內地房市復甦得很快，這一個月賣樓的情況又比較火，而北京等一線大城市的樓價一彈，又沒有回落多少，暫時內房股係可以睇好啲的股份類別。
　　最難睇的是美國，因為對股市最有利的是溫和復甦，若然復甦太慢，對入口需求太低，對中國經濟和股市都有影響。但若然復甦太快，例如經濟增長好快升上3%以上，就會令失業率加速回落，聯儲局勢將提前停止放水，對本地樓市以至股市的衝擊都好大。
　　港股要全年向上，出現最好的狀況，就要中國經濟持續向好兼能繼續維持寬鬆貨幣政策，兼且美國溫和復甦可以繼續QE，能否如此理想都只是五五波而已，所以較佳策略是等股市升高啲減持部份貨，靜候4、5月時回調時，再靜觀其變，到時可以略略減倉，但要記住唔好走得太快太急，否則走完先至發現場宴會原來只係食到鮑魚，你走快咗一半的話，你又會好揼心㗎啦。短線嚟講，我係睇好，唔係睇淡，特別係炒作者，可以順住嚟炒，唔好太早變淡友。
　　陸羽仁